ရိုဟင်ဂျာအရေး မြန်မာအားထုတ်မှုကို တရုတ်ထောက်ခံ အပါအဝင် နိုဝင်ဘာ ၁၆ ရက် မနက်ခင်း သိသင့်တဲ့ သတင်းများ

တရုတ်ဝန်ကြီးချုပ် လီကွတ်ချောင်က နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည် (၁) ရိုဟင်ဂျာအရေး မြန်မာအားထုတ်မှုကို တရုတ်ထောက်ခံ ပြည်တွင်း ငြိမ်းချမ်းရေးအပြင် ရိုဟင်ဂျာအရေး ချဉ်းကပ်လုပ်ဆောင်နေတဲ့ မြန်မာအစိုးရရဲ့ အားထုတ်မှုကို တရုတ်နိုင်ငံက ထောက်ခံလိုက်ပါတယ်။ မြန်မာနဲ့ ဘင်္ဂလားဒေ့ရှ်အကြား ဆွေးနွေးညှိနှိုင်းမှုတွေကတဆင့် ရခိုင်ပြည်နယ်အရေး ဖြေရှင်းတာကို တရုတ်နိုင်ငံက ထောက်ခံသလို ပြည်တွင်း ငြိမ်ချမ်းရေး လုပ်ဆောင်နေတဲ့ မြန်မာအစိုးရရဲ့အားထုတ်မှုတွေ ကိုလည်း ထောက်ခံတယ်ဆိုပြီး တရုတ်ဝန်ကြီးချုပ် လီကွတ်ချောင်က နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်နဲ့ တွေ့ဆုံချိန်မှာ ပြောကြားခဲ့တယ်လို့ တရုတ်နိုင်ငံခြားရေးဌာနက သတင်းထုတ် ပြန်ပါတယ်။ ဝန်ကြီးချုပ်လီနဲ့ ဒေါ်အောင်ဆန်းစုကြည်တို့ဟာ စင်ကာပူမှာပြုလုပ်တဲ့ အာဆီယံထိပ်သီးဆွေးနွေးပွဲ အတွင်း စက်တင်ဘာလ ၁၅ ရက်နေ့က သီးခြားတွေ့ဆုံခဲ့တာပါ။ ရိုဟင်ဂျာတွေအပေါ် မြန်မာစစ်တပ်ဘက်က အကြမ်းဖက်နှိမ်နင်းခဲ့မှုတွေနဲ့ပတ်သက်လို့ အမေရိကန် ဒုတိယ သမ္မတ မိုက်ပန့်စ်က ဝေဖန်ပြောဆိုခဲ့ပြီးနောက်မှာ တရုတ်ရပ်တည်ချက် ထွက်ပေါ်လာတာပါ။ မြန်မာအစိုးရရဲ့ ဆောင်ရွက်ချက်တွေကို နိုင်ငံတကာ မျက်နှာစာကနေပါ ဆက်လက်ပံ့ပိုး ကူညီမယ်လို့လည်း ပြောပါတယ်။ အလားတူပဲ အာဆီယံကလည်း မြန်မာအစိုးရ ဆောင်ရွက်နေတဲ့ နေရပ်စွန့်ခွာသွားတဲ့ ဒုက္ခသည်တွေ ပြန်လည်လက်ခံရေး လုပ်ငန်းအစီအစဉ်ကို ဆက်လက် ကူညီထောက်ပံ့မယ်လို့ ၃၃ ကြိမ်မြောက် အာဆီယံ ထိပ်သီး အစည်းအဝေး သဘောထားကြေညာချက်မှာ ဖော်ပြထားပါတယ်။ ရခိုင်ပြည်နယ်က လူမှုအသိုင်းအဝိုင်းတွေအကြား သဟဇာတဖြစ်ရေးကို မြှင့်တင်ဖို့ ၊ လုံခြုံရေး၊ ငြိမ်းချမ်းတည်ငြိမ်ရေး၊ တရားဥပဒေ စိုးမိုးရေးအတွက် ဆောင်ရွက်နေတာတွေကိုလည်း ဆက်လက်ကူညီ မယ်လို့ အဲဒီသတင်းထုတ်ပြန်ချက်မှာ ပါရှိပါတယ်။ (၂) နေရပ်ပြန်နေထိုင်ကြတဲ့ ထိုင်းမြန်မာနယ်စပ်က ဒုက္ခသည်တချို့ မြေယာအခက်အခဲကြုံနေရ နေရပ်ကို ပြန်လည်နေထိုင်ကြတဲ့ ထိုင်းမြန်မာနယ်စပ်က ဒုက္ခသည်တချို့ဟာ သူတို့ နေထိုင်ဖို့နဲ့ လုပ်ကိုင်စားသောက်ဖို့ မြေယာ အခက်အခဲတွေ ရှိနေတယ်လို့ ဒုက္ခသည်တွေကို ကူညီထောက်ပံ့နေတဲ့ အဖွဲ့တဖွဲ့ဖြစ်တဲ့ ထိုင်း-မြန်မာ နယ်စပ်ညွှန့်ပေါင်းအဖွဲ့ TBC က ထုတ်ပြန်လိုက်ပါတယ်။ သူတို့တွေဟာ ငြိမ်းချမ်းရေးနဲ့ အပစ်အခတ်ရပ်စဲရေး စတင်ခဲ့ပြီး နောက်ပိုင်းမှာ မူလနေရပ်ကို ပြန်လည်နေထိုင်ကြသူတွေ ဖြစ်တယ်လို့ TBC က ပြောပါတယ်။ မြန်မာနိုင်ငံ အရှေ့တောင်ဘက်ခြမ်းက ကရင်ပြည်နယ်၊ ကယားပြည်နယ်၊ မွန်ပြည်နယ်၊ တနင်္သာရီတိုင်းနဲ့ ပဲခူးတိုင်းက နေရပ်တွေဆီ ပြန်သွားတဲ့ ဒေသခံ ဒုက္ခသည်တွေဆီကို လူမှုအဖွဲ့အစည်းတွေက ကွင်းဆင်း လေ့လာမှုအရ လုပ်ကိုင်စားသောက်ကြဖို့ အတွက် မြေယာ အခက်အခဲတွေ အဓိက ကြုံနေတာကို တွေ့ရတယ်လို့ ထိုင်း-မြန်မာနယ်စပ်ညွှန့်ပေါင်းအဖွဲ့ရဲ့ ပြောရေးဆိုခွင့်ရှိသူ ဒန်ကန်မက်အာသာက ပြောပါတယ်။ " သူတို့တွေဟာ လယ်သမား မိသားစုတွေ ဖြစ်တယ်။ သူတို့ အသက်မွေးဝမ်းကျောင်း ပြန်စဖို့နဲ့ ရေရှည်ဖွံ့ဖြိုးဖို့ လယ်ယာစိုက်ပျိုးရေးမြေတွေ ပြန်လုပ်ခွင့်မရတာဟာ အဓိကပြဿနာပါ။ သူတို့ နေရပ်စွန့် ထွက်ပြေးတဲ့ ကာလမှာ တခြားလူတွေက သူတို့မြေယာကိုလာပြီး လုပ်ကိုင်ကြတယ်။ ဒီပြဿနာကို ဖြေရှင်းမယ့်သူလည်း မရှိဘူး။ အစိုးရကလည်း တရားဝင် စီစဉ်ဆောင်ရွက်ပေးတာ မရှိဘူး" လို့ မက်အာသာ က ပြောပါတယ်။ ဒါ့အပြင် ဒုက္ခသည်တွေ နေရပ်နဲ့ မနီးမဝေးမှာ တပ်စခန်းတွေ ရှိနေသေးတဲ့အတွက် သူတို့တွေက စိုးရိမ်နေကြတယ်လို့ TBC ရဲ့ ထုတ်ပြန်ချက်ထဲမှာ ဖော်ပြထားပါတယ်။

(၃) သတင်းမီဒီကောင်စီက တိုင်းအစိုးရအဖွဲ့ကိုယ်စားလှယ် အလဲဗင်းဂျာနယ်တို့နဲ့ ထပ်မံတွေ့ဆုံ Eleven Media သတင်းသမားတွေ ကိစ္စနဲ့ ပတ်သတ်ပြီး သတင်းမီဒီယာကောင်စီက တိုင်းအစိုးရအဖွဲ့ ကိုယ်စားလှယ် အပါအဝင် အလဲဗင်းဂျာနယ် တာဝန်ရှိသူတွေနဲ့ နိုဝင်ဘာ ၁၅ ရက်က သီးခြားစီ ထပ်မံ တွေ့ဆုံခဲ့ပါတယ်။ ဒီလို သီးခြားစီတွေ့ဆုံရာမှာ အလဲဗင်းဂျာနယ်ဘက်က အားလုံးကို ပြေလည်အောင် ဆောင်ရွက်မယ်လို့ ပြောဆိုခဲ့တဲ့ သဘောထားကို တိုင်းအစိုးရအဖွဲ့ကို စကားပါးနိုင်တဲ့အတွက် နှစ်ဖက်တွေ့ဆုံ ညှိနှိုင်းကြရင် ငြိမ်းငြိမ်းချမ်းချမ်း ဖြေရှင်းပြီးသွားလိမ့်မယ်လို့ သတင်း မီဒီယာ ကောင်စီဥက္ကဋ္ဌ ဦးအုန်းကြိုင်က ပြောပါတယ်။ " တိုင်းအစိုးရ ကိုယ်စားလှယ် ဦးအောင်ကျော်ခိုင်ကတော့ ဒါတွေကို ဆုံးဖြတ်ချက် ချပေးနိုင်မယ့်သူဆီ ပြန်တင်ပြပေးမယ်လို့ ပြောတယ်၊ သူက ညွှန်ကြားရေးမှုးအဆင့်ဆိုတော့ ချက်ချင်း အဖြေမပေးနိုင်ဘူးပေါ့။ နောက်တကြိမ် တွေ့ဆုံရင်တော့ ဆုံးဖြတ်ချက်ချနိုင်တဲ့သူ လာပါလိမ့်မယ်" လို့ ဦးအုန်းကြိုင်က ပြောပါတယ်။ ထပ်မံတွေ့ဆုံ ညှိနှိုင်းမှုကို လာမယ့်ဒီဇင်ဘာ လဆန်းမှ ပြန်စနိုင်မယ်လို့လည်း သူက ပြောပါတယ်။ အလဲဗင်းသတင်းသမား ၃ ဦး ကို အောက်တိုဘာ ၈ ရက် နေ့စွဲနဲ့ ထုတ်ခဲ့တဲ့ Weekly Eleven ဂျာနယ်ပါ " အမြဲရှုံးနေတဲ့ စက်သုံးဆီဆိုင်တွေ ပိတ်ရေး၊ ငွေချေးသူ ဘယ်သူမှန်း မသိတဲ့ ကျောင်းကားနဲ့ လူနာမည်ပေါက် ပြည်သူ့ရှယ်ယာ" ခေါင်းစဉ်နဲ့ ဆောင်းပါးကြောင့် ရန်ကုန်တိုင်းအစိုးရက နိုင်ငံတော် အကြည်ညိုပျက်စေမှု ပုဒ်မ နဲ့ တရားစွဲဆိုခဲ့တာ ဖြစ်ပါတယ်။ ဒီအမှုနဲ့ ပတ်သက်ပြီး သမ္မတဦးဝင်းမြင့်က သတင်းမီဒီယာဥပဒေ ပုဒ်မ ၂၁ အရ နစ်နာတဲ့အဖွဲ့အစည်းဌာန၊ ပုဂ္ဂိုလ် ဟာ အရင်ဦးဆုံး သတင်းမီဒီယာကောင်စီကို တိုင်ကြားဖို့၊ မီဒီယာဥပဒေပုဒ် ၂၂ အရ သတင်းမီဒီယာကောင်စီက နှစ်ဘက်တွေ့ဆုံ ညှိနှိုင်းဖြေရှင်းဖို့ ညွှန်ကြားချက်ခဲ့လို့ အခုလို သတင်းမီဒီယာကောင်စီက တွေ့ဆုံဖြေရှင်း ပေးနေတာ ဖြစ်ပါတယ်။

(၃) ဗြိတိန် နုတ်ထွက်မှုဆိုင်ရာ သဘောတူညီချက် မူကြမ်းကို ပယ်ချရင် ပြန်ညှိနှိုင်းမှာမဟုတ် ဥရောပသမဂ္ဂ (အီးယူ)ကနေ ဗြိတိန်နုတ်ထွက်မှုဆိုင်ရာ သဘောတူညီချက် မူကြမ်းကို ဗြိတိန်လွှတ်တော် အမတ်တွေက ပယ်ချမယ်ဆိုရင် ပြန်ပြီးညှိနှိုင်းမှာ မဟုတ်ဘူးလို့ အီးယူခေါင်းဆောင်တွေက ပြောလိုက်ပါတယ်။ ဂျာမနီ အဓိပတိဖြစ်တဲ့ ဝန်ကြီးချုပ် အန်ခလာမာကယ်ကတော့ ဗြိတိန်နဲ့အီးယူကြား သဘောတူညီချက် တစ်ရပ် ထွက်လာပြီးပြီ ဖြစ်လို့ ဆွေးနွေးပွဲတွေ ပြန်လုပ်မလားဆိုတာတောင် မေးဖို့ မလိုတော့ဘူးလို့ ပြောထားပါတယ်။ ပြင်သစ်ဝန်ကြီးချုပ် အစ်ဒွါ့ဖီလစ်ကတော့ ဗြိတိန်နဲ့ အီးယူအကြား သဘောတူညီချက် မရနိုင်တဲ့ ခြေအနေအတွက် ပြင်ဆင်ထားဖို့လို့ပြီလို့ ပြောလိုက်ပါတယ်။ ဗြိတိန်အစိုးရအဖွဲ့ဝင် ဝန်ကြီးတွေ နှုတ်ထွက်တာနဲ့ ခေါင်းဆောင်မှုပိုင်းကို စိန်ခေါ်တာ ခံရနိုင်ချေရှိတဲ့ ဗြိတိန်ကြီးချုပ် ထရီဇာမေကတော့ သူ့ရဲ့ ဗြိတိန်နှုတ်ထွက်မှု အစီအစဉ်ကို ဆက်လုပ်ဖို့ ဆုံးဖြတ်ထားတယ်လို့ ပြောပါတယ်။ ကိုယ့်နိုင်ငံအရေး ဘယ်သူကမှ ပိုမသိနိုင် - ဒေါ်အောင်ဆန်းစုကြည် ဆက်စပ် အကြောင်းအရာများ