■ ဒဏ်ခတ် ခံထားရသော စစ်တပ်ပိုင် Mytel ကုမ္ပဏီကို ကမ္ဘာ့ဖလားဘောလုံးပြိုင်ပွဲ ရုပ်သံထုတ်လွှင့်ခွင့် လိုင်စင် ဖီဖာ FIFA ချပေ

Western News| ဇွန် ၁၀ ၂၀၂၆ ခုနှစ် ကမ္ဘာ့ဖလားဘောလုံးပြိုင်ပွဲ၏ မြန်မာနိုင်ငံအတွက် ရုပ်သံထုတ်လွှင့်ပြသခွင့် လိုင်စင်ကို ကမ္ဘာ့ဘောလုံးအဖွဲ့ချုပ် (FIFA) က အကြမ်းဖက် စစ်ကောင်စီ စစ်တပ်ပိုင် Mytel ဆက်သွယ်ရေးကုမ္ပဏီကို ချပေးလိုက်ကြောင်း ဖီဖာထုတ်ပြန်ချက်အရ သိရသည်။ အကြမ်းဖက် စစ်တပ်ပိုင် Mytel ဆက်သွယ်ရေးကုမ္ပဏီမှာ အမေရိကန်နိုင်ငံ၏ ဒဏ်ခတ်ပိတ်ဆို့မှုကို ခံထားရပြီး မြန်မာပြည်သူများမှာလည်း မိုင်တဲလ် ဝန်ဆောင်မှုများကို အသုံးပြုမှု မရှိကြပေ။ မြန်မာစစ်တပ်၏ အကြမ်းဖက်လုပ်ရပ်များအတွက် ထောက်ပံ့ပေးနေသော Mytel ကုမ္ပဏီကို မြန်မာပြည်သူများအပါအဝင် နိုင်ငံတကာက အရေးယူမှု ပြုလုပ်ထားသော်လည်း ကမ္ဘာ့ဘောလုံးအဖွဲ့ချုပ် (FIFA) မှာ အရေးတယူ ဆက်ဆံမှုများ ပြုလုပ်နေကြောင်း သိရသည်။ ၂၀၂၆ ကမ္ဘာ့ဖလားဘောလုံးပြိုင်ပွဲကို အမေရိကန်၊ ကနေဒါ၊ မက္ကစီကို ၃ နိုင်ငံက ပူးတွဲအိမ်ရှင်အဖြစ် လက်ခံကျင်းပသွားမည်ဖြစ်ပြီး ပြိုင်ပွဲအား မကြာမီရက်ပိုင်းအတွင်း စတင်တော့မည်ဖြစ်သည်။ မြန်မာနိုင်ငံအတွက် လိုင်စင်ရရှိထားသော Mytel ဆက်သွယ်ရေးကုမ္ပဏီက ကမ္ဘာ့ဖလားဘောလုံးပြိုင်ပွဲကို အွန်လိုင်းရုပ်ရှင်ပလက်ဖောင်းတစ်ခုဖြစ်သည့် TV360 Application မှ ထုတ်လွှင့်ပြသသွားမည်ဟု သိရသည်။ Justice For Myanmar ကလည်း အကြမ်းဖက် စစ်တပ်ပိုင် Mytel ကုမ္ပဏီကို နိုင်ငံတကာမှ အရေးယူဆောင်ရွက်ပေးရန် တောင်းဆိုထားမှု ရှိပြီး စစ်အာဏာသိမ်းပြီးနောက် ၃ လအတွင်းမှာ သုံးစွဲသူ ၂ သန်းခန့် လျော့ကျသွား၍ ဝင်ငွေ အမေရိကန်ဒေါ်လာ ၂၅ သန်းနီးပါး ထိခိုက်သွားသည်ဟု ဆိုသည်။ အကြမ်းဖက် စစ်ကောင်စီ၏ မြန်မာပြည်သူများအပေါ် နေ့စဉ် အကြမ်းဖက်မှု၊ စစ်ရာဇဝတ်မှု ကျူးလွန်ရန် ငွေထောက်ပံ့ပေးနေသော Mytel ဆက်သွယ်ရေးကုမ္ပဏီကို ကမ္ဘာ့ဘောလုံးအဖွဲ့ချုပ် (FIFA) က လိုင်စင်ချပေးခြင်းမှာ ရွံရှာစရာ ကောင်းသည်ဟု မြန်မာဒီမိုကရေစီအင်အားစုများမှ ဝေဖန်ထားကြသည်။ #WesternNews #WN #၂၀၂၆ #ကမ္ဘာ့ဖလားဘောလုံးပြိုင်ပွဲ #မြန်မာနိုင်ငံ #ရုပ်သံထုတ်လွှင့်ပြသခွင့် #အကြမ်းဖက်စစ်ကောင်စီ #စစ်တပ်ပိုင်မိုင်တဲလ် #Mytel #လိုင်စင်ရရှိ #FIFA #ဖီဖာ